ករណីបុរសជនជាតិចិនម្នាក់ព្យាយាមលោតចេញពីរថយន្ត សមត្ថកិច្ចអះអាងថា ករណីចាប់ជំរិតទារប្រាក់

ភ្នំពេញ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានឱ្យដឹងថា បន្ទាប់ពីមានការបង្ហោះវីដេអូ ករណីបុរសជនជាតិចិនម្នាក់ បានព្យាយាមលោតចេញពីរថយន្តម៉ាក Prius ពណ៌ក្រហម គឺជាករណីជំរិតទារប្រាក់ពីជនរងគ្រោះជាជនជាតិចិន។

ក្នុងករណីនេះ កាលពីថ្ងៃទី៣ ខែមីនា ឆ្នាំ២០២៥ នៅតាមបណ្តោយផ្លូវក្រវ៉ាត់ក្រុងទី៣ មានករណីបុរសជនជាតិចិនម្នាក់ បានព្យាយាមលោតចេញតាមបង្អួចរថយន្តម៉ាកព្រូស ពណ៌ក្រហម ដែលត្រូវបានគេបង្ហោះផ្សព្វផ្សាយតាមបណ្តាញសង្គមបង្កឱ្យមានការភ្ញាក់ផ្អើល។

ក្រោយពីទទួលបានព័ត៌មានខាងលើភ្លាម ដោយអនុវត្តតាមបទបញ្ជាលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល កម្លាំងជំនាញបានធ្វើការស្រាវជ្រាវទទួលបានលទ្ធផលគឺ ករណីចាប់ជំរិតទារប្រាក់ កើតហេតុនៅថ្ងៃទី៣ ខែមីនា ឆ្នាំ២០២៥ វេលាម៉ោង ១៥:១០នាទី ចំណុចផ្លូវក្រវ៉ាត់ក្រុងទី៣ ស្ថិតក្នុងភូមិក្រាំងទ្រា ឃុំព្រះពុទ្ធ ស្រុកកណ្តាលស្ទឹង ខេត្តកណ្ដាល។

ជនរងគ្រោះត្រូវបានគេស្គាល់ឈ្មោះ LIU SEN ភេទប្រុស អាយុ៣៨ឆ្នាំ ជនជាតិចិន កាន់លិខិតឆ្លងដែនលេខEN6418573 មានសុពលភាពលិខិតឆ្លងដែន ២៣.០១.២០៣៥ សុពលភាពទិដ្ឋាការ ០២.០៤.២០២៥។

ចំណែកជនសង្ស័យមានគ្នាចំនួន ៤នាក់ ភេទប្រុស ជនជាតិខ្មែរ មិនទាន់ស្គាល់អត្តសញ្ញាណកំពុងរត់គេចខ្លួន ហើយកម្លាំងជំនាញកំពុងស្រាវជ្រាវរកអត្តសញ្ញាណជនសង្ស័យ និងម្ចាស់រថយន្តខាងលើ យកមកចាត់ការតាមនីតិវិធីច្បាប់៕