ប្រមុខក្រសួងការពារជាតិ ណែនាំដល់កងកម្លាំងប្រដាប់អាវុធ ត្រូវបង្កើនការខិតខំទប់ស្កាត់ និងបង្ក្រាបបទល្មើសឆ្លងដែនខុសច្បាប់ ពិសេសការជួញដូរគ្រឿងញៀន និងបទល្មើសសេដ្ឋកិច្ច

បាត់ដំបង៖ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ លោក នាយឧត្តមសេនីយ៍ ទៀ សីហា បានណែនាំបន្ថែមដល់កងកម្លាំងប្រដាប់អាវុធទាំងអស់ ត្រូវបង្កើនការខិតខំទប់ស្កាត់ និងបង្ក្រាបបទល្មើសឆ្លងដែនខុសច្បាប់ ពិសេសការជួញដូរគ្រឿងញៀន និងបទល្មើសសេដ្ឋកិច្ច ។

ការណែនាំនេះ ក្នុងដំណើរចុះសួរសុខទុក្ខ និងសំណេះសំណាលជាមួយនាយទាហាន នាយទាហានរង និងពលទាហាន នៃកងយោធពលខេមរភូមិន្ទ ទិសយោធភូមិភាគទី៥ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ នាពេលខាងមុខ នៅទីបញ្ជាការកងការពារព្រំដែនលេខ ៥០២ ស្រុកសំឡូត ខេត្តបាត់ដំបង កាលពីថ្ងៃទី០៥ ខែមីនា ឆ្នាំ២០២៥ ដោយមានអង្គភាពចំនួន១៨ បានចូលរួមផងដែរ ។

លោក នាយឧត្តមសេនីយ៍ ទៀ សីហា បានក្រើនរម្លឹកដល់មេបញ្ជាការធ្វើយ៉ាងណាគ្រប់គ្រងសម្ភារបច្ចេកទេសឱ្យបានល្អ ម្យ៉ាងវិញទៀតសូមនាយទាហាន នាយទាហានរង និងពលទាហានទាំងអស់ត្រូវជៀសឱ្យឆ្ងាយពីគ្រឿងញៀន ពិសេសកុំពាក់ព័ន្ធនឹងគ្រឿងញៀនឱ្យសោះ ។

លោក នាយឧត្តមសេនីយ៍ បានស្នើដល់កងកម្លាំងប្រដាប់អាវុធ និងគ្រប់ផ្នែកពាក់ព័ន្ធទាំងអស់នៅច្រកទ្វារព្រំដែន ត្រូវបង្កើនការខិតខំ ការពារទប់ស្កាត់ បង្ក្រាបការឆ្លងដែនខុសច្បាប់ ទាំងពលករ ទាំងការជួញដូរគ្រឿងញៀន ព្រមទាំងបទល្មើសសេដ្ឋកិច្ច តាមបទបញ្ចារបស់រាជរដ្ឋាភិបាល និងរក្សាសម្ព័ន្ធមេត្រីភាពរវាងកម្លាំងប្រដាប់អាវុធនៅសមរភូមិមុខ និងមន្ត្រីរាជការសមរភូមិក្រោយឱ្យកាន់តែរឹងមាំថែមទៀត ។

លោក ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានកោតសរសើរដល់កងកម្លាំងការពារព្រំដែន ដែលបានអនុវត្តនូវតួនាទីភារកិច្ចរបស់ខ្លួន ដែលឈរជើងការពារព្រំដែនគោកតាមខ្សែបន្ទាត់ព្រំដែនកម្ពុជា ថៃ ដោយបានជម្នះឧបសគ្គតូចធំគ្រប់បែបយ៉ាង និងប្រកៀកស្មាគ្នា សាមគ្គីភាពផ្ទៃក្នុង ក្នុងបុព្វហេតុការពារសន្តិភាព អធិបតេយ្យភាព និងបូរណភាពទឹកដី ថែមទាំងបានការពារសន្តិសុខសណ្ដាប់ធ្នាប់សាធារណៈ ជូនដល់ប្រជាពលរដ្ឋ ពិសេសចូលរួមយ៉ាងសកម្មជាមួយអាជ្ញាធរមូលដ្ឋាន ក្នុងការអភិវឌ្ឍន៍មូលដ្ឋាន ដែលសម្រេចបាននូវសមិទ្ធផលជាច្រើនជូនដល់ប្រជាពលរដ្ឋយើងផងដែរ ។

ក្នុងឱកាសនោះ លោក នាយឧត្តមសេនីយ៍ ទៀ សីហា មិនភ្លេចនាំនូវការផ្តាំផ្ញើរសួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចគតិព្រឺទ្ធបណ្ឌិត ប៊ុន រ៉ានី ហ៊ុន សែន និងការនឹករឮក ពីសម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកស្រី និងពីសម្តេចពិជ័យសេនា ទៀ បាញ់ អតីតឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ មកជម្រាបជូនដល់នាយទាហាន នាយទាហានរង និងពលទាហានទាំងអស់ ដែលឈរជើងការពារនៅបន្ទាត់ព្រំដែននាពេលនេះផងដែរ ។

សូមបញ្ជាក់ថា ដើម្បីចូលរួមអបអរសាទរ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ ដែលនឹងឈានចូលនាពេលខាងមុខនោះ លោក នាយឧត្តមសេនីយ៍ ទៀ សីហា ក៏បានឧបត្ថម្ភនូវថវិកាមួយចំនួន ដល់គ្រប់អង្គភាពនៃកងកម្លាំងប្រដាប់អាវុធទិសយោធភូមិភាគទី៥ ផងដែរ ៕