DeepSeek បានទាក់ទាញការចាប់អារម្មណ៍ច្រើនពីបុគ្គលនៅពីក្រោយ DeepSeek តើស្ថានិក AI DeepSeek ជានរណា?

ក្រុមហ៊ុនចិន DeepSeek នៅថ្ងៃទី២០ ខែមករា បានប្រកាសនូវម៉ូដែល V3 និង R1 ដោយឥតគិតថ្លៃដែលត្រូវដាក់លើបន្ទះឈីបតម្លៃសមរម្យរបស់ក្រុមហ៊ុន Nvidia ដែលជាប្រភពបើកចំហ (Open Source) ១០០ភាគរយ និងមានតម្លៃថោកជាង OpenAI o1 ដល់ទៅ៩៦,៤ភាគរយ ស្របពេលវាផ្តល់នូវដំណើរការស្រដៀងគ្នា។ 

DeepSeek បានទាក់ទាញការចាប់អារម្មណ៍ច្រើនពីបុគ្គលនៅពីក្រោយ DeepSeek។ ដូច្នេះថាតើស្ថានិក AI DeepSeek ជានរណា?

 

ប្រព័ន្ធ​ផ្សព្វផ្សាយ​ចិន​បាន​សរសេរ​ថា ការ​ចាប់​ផ្តើម​បង្កើត​ប្រព័ន្ធ AI នេះ​មាន​ទីស្នាក់ការ​នៅ​ក្នុង​ទីក្រុង Hangzhou។ ម្ចាស់ភាគហ៊ុនគ្រប់គ្រងរបស់ក្រុមហ៊ុនគឺ លោក Liang Wenfeng អាយុ ៤០ឆ្នាំ ដែលបានបញ្ចប់ការសិក្សាផ្នែក AI ពីសាកលវិទ្យាល័យ Zhejiang។ 

 

លោក Liang បានបង្កើតមូលនិធិការពារហានិភ័យបរិមាណ High-Flyer ក្នុងឆ្នាំ២០១៥ ដែលល្បីល្បាញដោយសារភាពច្នៃប្រឌិតក្នុងការអនុវត្តយុទ្ធសាស្រ្តជួញដូរដែលមានមូលដ្ឋានលើ AI។ 

 

នៅឆ្នាំ២០២៣ ក្រុមហ៊ុន High-Flyer Quant បានប្រកាសថា ខ្លួននឹងផ្តោតលើការកសាងមជ្ឈមណ្ឌលឯកទេសមួយដើម្បីស្រាវជ្រាវ AGI super intelligence ។ មូលនិធិនេះក៏មានកម្មសិទ្ធិប៉ាតង់ជាច្រើនទាក់ទងនឹងការផ្គុំបន្ទះឈីបដែលប្រើដើម្បីបណ្តុះម៉ូដែល AI។

 

លោក Liang បានចាប់ផ្តើមទិញបន្ទះឈីបក្រាហ្វិក Nvidia រាប់ពាន់ នៅក្នុងឆ្នាំ២០២១ ដើម្បីបម្រើដល់គម្រោង AI មុនពេលរដ្ឋបាលរបស់ប្រធានាធិបតីអាម៉េរិក លោក ចូ បៃឌិន បានដាក់កម្រិតលើការនាំចេញទៅកាន់ចិន។ មជ្ឈមណ្ឌល AI របស់ High-Flyer ក្នុងឆ្នាំ២០២២ បានអះអាងថា បានកាន់កាប់ និងដំណើរការបន្ទះឈីប Nvidia A100 ប្រមាណ ១០ ០០០បន្ទះ ។

 

នៅក្នុងបទសម្ភាសមួយក្នុងខែកក្កដា ឆ្នាំ២០២៤ លោក Liang បានបង្ហាញពីមហិច្ឆតារបស់លោកសម្រាប់ DeepSeek និងយុទ្ធសាស្រ្ត AI ទាំងមូលរបស់ចិន។ លោកលើកឡើងថា​ ៖«អាជីវកម្មចិនជាច្រើនឆ្នាំត្រូវបានទម្លាប់ប្រើប្រាស់ការច្នៃប្រឌិតបច្ចេកវិទ្យាដែលបានអភិវឌ្ឍនៅបរទេស និងរកប្រាក់ដោយប្រើកម្មវិធីដោយផ្អែកលើពួកវា។ នេះមិនមាននិរន្តរភាពទេ។ គោលដៅរបស់យើងគឺមិនមែនដើម្បីរកប្រាក់ចំណេញបានឆាប់រហ័សនោះទេ ប៉ុន្តែពង្រីកព្រំដែននៃបច្ចេកវិទ្យាដើម្បីលើកកម្ពស់ការអភិវឌ្ឍប្រព័ន្ធអេកូឡូស៊ី»។ 

 

លោក Liang ជាបុគ្គលម្នាក់ មិនសូវចេញមុខជាសាធារណៈច្រើនឡើយ។ 

 

ដៃគូអាជីវកម្មម្នាក់របស់លោក Liang បានប្រាប់កាសែត Financial Times ថា៖« ពេលយើងជួបគ្នាដំបូង គាត់ដូចជាបុរសសង្ហាម្នាក់នេះ ជាមួយនឹងម៉ូដសក់ដ៏គួរឱ្យខ្លាច ហើយពួកយើងបាននិយាយគ្នាអំពីការកសាងចង្កោមចំនួន ១០ ០០០បន្ទះឈីប ដើម្បីបង្វឹកម៉ូដែល AI យើងមិនបានយកចិត្តទុកដាក់ច្រើនទេ។ លោកមិន​អាច​បង្ហាញ​ពី​ចក្ខុវិស័យ​ខ្លួនលើស​ពី​ការ​និយាយ​ថា​ ខ្ញុំ​ចង់​បង្កើត​វា ហើយ​វា​នឹង​ក្លាយ​ជា​ការ​ផ្លាស់​ប្តូរ​ដ៏​ធំ​មួយ យើង​បាន​គិត​ថា​អ្វី​ដែល​ជាការស្រមៃ​នោះ ​អាច​មាន​នៅក្នុង​ក្រុមហ៊ុនយក្ស​ដូច​ជា ByteDance និង Alibaba»។

 

អ្នកដឹកនាំរបស់ចិន ក៏កំពុងយកចិត្តទុកដាក់ចំពោះ DeepSeek ដែរ។ មុនពេលម៉ូដែល R1 ត្រូវបានដាក់ឱ្យដំណើរការ លោក Liang ត្រូវបានអញ្ជើញឱ្យចូលរួមក្នុងសន្និសីទបិទទ្វារនៃអាជីវកម្មនៅក្នុងឧស្សាហកម្ម ដែលដឹកនាំដោយនាយករដ្ឋមន្ត្រីចិន លី ឈាំង នៅថ្ងៃទី២០ ខែមករា។

 

អ្នកជំនាញនិយាយថា DeepSeek បច្ចុប្បន្នមិនមានហានិភ័យដែលត្រូវបានហាមឃាត់ដោយរដ្ឋាភិបាលអាម៉េរិកនោះទេ។ «ពួកគេក៏មិនបានដាក់ចេញនូវកំណែពាណិជ្ជកម្ម ឬផែនការបង់ប្រាក់ទេ ដូច្នេះមិនមានផលប៉ះពាល់ផ្នែកហិរញ្ញវត្ថុដោយផ្ទាល់ទេ ប្រសិនបើអាម៉េរិកដាក់កម្រិតពួកគេ។ 

 

ពួកគេ​មិន​បាន​ទទួល​ការ​វិនិយោគ​ពី​ខាង​ក្រៅ​ឡើយ ថវិកា​ទាំង​អស់​ត្រូវ​បាន​យក​ចេញ​ពី​មូលនិធិ​ការពារ​ហានិភ័យ​របស់​ស្ថាបនិក ។ ដូច្នេះ​មិន​មាន​សម្ពាធ​សម្រាប់​ម្ចាស់​ភាគហ៊ុន​ក្នុង​ការ​ដក​ចេញ​ឡើយ»។ ​លោក Phelix Lee អ្នក​វិភាគក្រុមហ៊ុនហិរញ្ញវត្ថុ Morningstar បានលើកឡើងបែបនេះ។

 

DeepSeek ប្រើកូដប្រភពបើកចំហ(Open Source)។ សេណារីយ៉ូដែលអាចធ្វើទៅបានបំផុតគឺថាក្រុមហ៊ុនអាម៉េរិកអាចប្រើកូដសាធារណៈនៃអាជីវកម្មចិន ដើម្បីបំពេញគំរូដែលពួកគេបានបង្កើតដោយខ្លួនឯង។ លោក Lee បានបន្ថែមថា ៖«នេះអាចជួយកាត់បន្ថយការចំណាយលើកុំព្យូទ័រ AI សាកល»៕